Home / Lajme / Intervista e bujshme e princeshë Dianës në 1995, BBC kërkon falje pas 27 vitesh: “E mashtruam…”

Intervista e bujshme e princeshë Dianës në 1995, BBC kërkon falje pas 27 vitesh: “E mashtruam…”

Drejtori i përgjithshëm i BBC-së, Tim Davie i ka kërkuar publikisht falje Princit Charles dhe djemve të tij, William dhe Harry, për intervistën e Princeshës Diana të vitit 1995 dhënë për gjigantin mediatik britanik.

Diana u intervistua nga gazetari Martin Bashir gjatë emisionit ‘Panorama’. Intervista bëri historinë në atë kohë me zbulimet e bëra nga Diana për martesën e saj me Princin Charles dhe në përgjithësi për familjen mbretërore. “Ne kemi qenë gjithmonë tre në martesën tonë”, tha në atë kohë princesha referuar Camillas, e cila u bë zyrtarisht gruaja e Charles vite më vonë. Pas kësaj interviste çifti u divorcua në 1996.

Zbulimet rezultuan se ishin marrë përmes mashtrimit. Tani, BBC ka kërkuar zyrtarisht falje dhe ka premtuar se nuk do ta transmetojë më intervistën. Në vitin 2021, një hetim i pavarur për programin, i kryer nga Lord Dyson, zbuloi se transmetuesi publik britanik “nuk i plotësonte standardet e larta të integritetit dhe transparencës që janë shenjë dalluese e tij”.

Hetimi filloi pasi vëllai i Princeshës së Uellsit, Earl Spencer, akuzoi BBC-në për “pandershmëri të plotë”. Në të vërtetë, u zbulua se gazetari Martin Bashir kishte përdorur metoda mashtruese për të marrë intervistën me Dianën, duke përfshirë dokumente të dyshuara të falsifikuara.

Earl Spencer kishte vite që kërkonte akuza penale nga personat e përfshirë. Por Scotland Yard lëvizi vetëm kur avokatja Louise Prince i shpjegoi gjykatës se akuzat e bëra gjatë intervistës shkaktuan “pasoja të rënda personale për të gjithë të interesuarit”.

Menjëherë pas vendimit të gjykatës, BBC lëshoi deklaratën ku thuhej se: “Që nga publikimi i Raportit Dyson vitin e kaluar, ne kemi punuar me ata që kanë vuajtur nga taktikat mashtruese të përdorura nga BBC në ndjekjen e intervistës së saj me Dianën. Do të doja të përfitoj nga ky rast për t’i kërkuar falje publike Princit të Uellsit Charles dhe Dukës së Kembrixhit William dhe Sussex Harry, për mënyrën se si u mashtrua Princesha Diana dhe ndikimi pasues në të gjithë jetën e tyre. Siç tha vetë Duka i Kembrixhit, BBC gaboi që nuk i bëri vetes pyetje. Nëse do të kishim bërë punën tonë si duhet, Princeshë Diana do ta dinte të vërtetën kur ajo ishte ende gjallë. Ne e kemi zhgënjyer atë, familjen mbretërore dhe audiencën tonë”, deklaron BBC.

Rreth korcajone.al

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *